उदयपुर सिमेण्टका तत्कालिन महाप्रबन्धकसहित ८ जनाविरुद्ध मुद्धा दायर

काठमाडौँ: उदयपुर सिमेण्ट उद्योगका तत्कालीन महाप्रवन्धक सुरेन्द्र कुमार पौडेलसमेत ८ जनाविरुद्ध मुद्धा दायर भएको छ ।

अख्तियार दुरुपयोग अनुसन्धान आयोगले उद्योगमा क्लिङ्करको बढी खपत देखाएर ४६ करोड ५२ लाख ७४ हजार ४२६ अनियमितता गरेको भन्दै विशेष अदालत काठमाडौँमा मुद्धा दायर गरेको जानकारी दिएको छ ।

अख्तियारले उद्योगका तत्कालीन महाप्रवन्धक सुरेन्द्र कुमार पौडेलविरुद्ध १२ करोड ४७ लाख २२ हजार २४२ बिगो माग गरेको छ । त्यस्तै तत्कालिन निमित्त महाप्रवन्धक नवल किशोर साहविरुद्ध ४६ करोड ५२ लाख ७४ हजार ४२६ बिगो माग गरेको छ ।  

त्यस्तै तत्कालिन निमित्त महाप्रवन्धक महेश प्रसाद काफ्लेविरुद्ध १२ करोड ६३ लाख ६९ हजार १६८ बिगो माग गरेको छ ।

त्यसैगरी तत्कालीन उत्पादन महाशाखा प्रमुख संजय कुमार लाल, तत्कालीन भण्डार महाशाखा प्रमुख महेश प्रसाद साह, तत्कालीन कलिङ्कर उत्पादन विभाग प्रमुख रवीचन्द्र पौडेल, तत्कालीन  सिमेन्ट उत्पादन विभाग प्रमुख हरि प्रसाद अधिकारी र तत्कालीन बिक्री विभाग प्रमुख राम बहादुर जीसीविरुद्ध ४६ करोड ५२ लाख ७४ हजार ४२६ बिगो माग गरेको छ ।

अख्तियारले बिगो बमोजिमको जरिवाना गरी भ्रष्टाचार निवारण ऐन, २०५९ को दफा १७ बमोजिम बिगोसहित कानुन अनुसार कारवाहीको माग गरेको छ ।