मकवानपुर क्षेत्र नं. १ को निर्वाचनः महालक्ष्मी उपाध्याय ‘डीना’ को संसदीय सान्दर्भिकता

मकवानपुर: आगामी फागुन २१ गते हुने निर्वाचनले मकवानपुर क्षेत्र नं. १ मा यतिबेला चुनावी माहोल तताएको छ । नेपाली कांग्रेसका तर्फबाट महालक्ष्मी उपाध्याय ‘डीना’, नेकपा एमालेबाट रामेश्वर राना, नेकपाबाट विजय गौतम, रास्वपाबाट प्रकाश गौतम र राप्रपाबाट दीपक सिंह लगायत चुनावी मैदानका सशक्त खेलाडीका रूपमा देखा परेका छन् । 

मकवानपुर १ का लागि यो चुनाव केवल एकजना जनप्रतिनिधि छान्ने प्रक्रिया मात्र होइन, यसले राष्ट्रिय राजनीतिमा मकवानपुरको पहुँच र संसद्मा प्रभावकारी नेतृत्वको उपस्थितिलाई पनि निर्धारण गर्नेछ ।

यस निर्वाचनमा नेपाली कांग्रेसका तर्फबाट सह–महामन्त्री महालक्ष्मी उपाध्याय ‘डीना’ प्रमुख उम्मेदवारका रूपमा मैदानमा छिन् । ४० वर्ष लामो राजनीतिक अनुभव, पार्टीको उच्च तहमा पहुँच र संसदीय प्रक्रियाको गहिरो ज्ञान भएका कारण उनको उपस्थिति यसपटकको संसद्मा किन अनिवार्य छ भन्ने तथ्यहरूले उनको उम्मेदवारीलाई थप बलियो बनाएका छन् ।

राजनीतिक निरन्तरता र ४० वर्षको सांगठनिक अनुभव

महालक्ष्मी उपाध्याय ‘डीना’ को राजनीतिक पृष्ठभूमि कुनै आकस्मिकता होइन, बरु यो चार दशक लामो निरन्तर संघर्षको परिणाम हो । वि.सं. २०३६ सालको विद्यार्थी आन्दोलनदेखि सक्रिय उपाध्यायले पञ्चायती व्यवस्थाको अन्त्य र प्रजातन्त्रको पुनर्बहालीका लागि आफ्नो सम्पूर्ण जीवन खर्चिएकी छिन् । उनको राजनीतिक यात्रा नेपाल विद्यार्थी संघको इकाइ तहदेखि सुरु भएर नेपाली कांग्रेसको सह–महामन्त्री जस्तो शक्तिशाली पदसम्म पुग्यो । यसबीचमा उनले भोगेका राजनीतिक उतारचढाव, जेल जीवन र हिरासतका अनुभवहरूले उनलाई एक परिपक्व र अनुभवी नेताका रूपमा स्थापित गरेका छन् । मकवानपुरको सन्दर्भमा, उनले यहाँका प्रत्येक गाउँ र बस्तीका समस्याहरूलाई नजिकबाट बुझेकी छिन् ।

राजनीतिमा अनुभवको महत्व यसकारण हुन्छ कि अनुभवी नेताले मात्र राज्यको नीति निर्माणमा परिपक्व भूमिका खेल्न सक्छ । डीना उपाध्यायले पार्टीको केन्द्रीय कार्यसमिति र संविधानसभा सदस्यका रुपमा लामो समय रहेर काम गरेकी छिन् । उनले संविधान निर्माणका साथै पार्टीको विधान निर्माण, संगठन विस्तार र लोकतान्त्रिक आन्दोलनका हरेक मोर्चामा आफूलाई प्रमाणित गरिसकेकी छिन् । उनको यो अनुभव मकवानपुर क्षेत्र नं. १ का मतदाताका लागि एउटा ठूलो पुँजी हो । 

निर्वाचन जित्नु र संसद्मा गएर आफ्नो क्षेत्रको मुद्दालाई प्रभावकारी ढंगले राख्नु दुई फरक कुरा हुन् । डीनासँग ती मुद्दाहरूलाई राष्ट्रिय स्तरमा बहसमा ल्याउन सक्ने राजनीतिक क्षमता छ । उनले विगतमा गरेका संघर्षहरूले नै उनलाई आजको अवस्थामा ल्याएको हो । उनको राजनीतिक यात्रामा निष्ठा र अडान सधैं प्रधान रहेका छन् । कुनै पनि राजनीतिक लोभ वा अवसरका लागि उनले आफ्नो आदर्श कहिल्यै त्यागिनन् । त्यसैले, मकवानपुरका मतदाताले उनलाई एक भरोसायोग्य नेताका रूपमा हेरिरहेका छन् । ४० वर्षको यो लामो लगानीलाई यसपटक मकवानपुरका मतदाताले उच्च मूल्यांकन गर्ने अपेक्षा गरिएको छ ।

संसदीय भूमिका र ३३ प्रतिशत महिला सहभागिताको नेतृत्व साथै ५० प्रतिशतको लक्ष्य

नेपालको संसदीय इतिहासमा महिलाहरूको अर्थपूर्ण सहभागिता सुनिश्चित गराउन डीना उपाध्यायले खेलेको भूमिका ऐतिहासिक छ । उनी केवल एक सांसदका रूपमा मात्र सदनमा रहिनन्, बरु नीति निर्माणको तहमा हस्तक्षेपकारी भूमिका निर्वाह गरिन् । विशेषगरी संविधान निर्माणका क्रममा र पार्टीको विधान परिमार्जन गर्दा उनले राज्यका हरेक निकायमा महिलाको ५० प्रतिशतको सहभागिताको माग सशक्त उछाइन् र ३३ प्रतिशत सहभागिता अनिवार्य लागु गराउन भूमिका खेलिन् । जसको फल आज नेपालको राजनीतिले पाइरहेको छ । उनले संसद्मा पटक–पटक उठाएको एउटा मुख्य विषय हो– “संख्यात्मक उपस्थिति मात्र पर्याप्त छैन, निर्णायक तहमा महिलाको पहुँच हुनुपर्छ ।” उनले विगतमा संसद्मा बोल्दै भनेकी थिइन् कि जबसम्म महिलाहरू नीति निर्माण र कार्यान्वयनको मुख्य तहमा पुग्दैनन्, तबसम्म समावेशी लोकतन्त्रको लक्ष्य पूरा हुन सक्दैन ।

उनी संसद्मा रहँदा केवल महिलाका मुद्दामा मात्र सीमित रहिनन् । उनले जलस्रोत राज्यमन्त्रीका रूपमा कार्यभार सम्हाल्दा जलस्रोतको उचित उपयोग र ऊर्जा विकासका क्षेत्रमा महत्वपूर्ण नीतिगत निर्णयहरू गराएकी थिइन् । उनको संसदीय दक्षता यसकारण पनि आवश्यक छ कि उनले ऐन, कानुन र नियमावलीहरू बनाउँदा जनमैत्री हुनुपर्छ भन्नेमा सधैं जोड दिएकी छिन् । अहिले पनि धेरै पुराना कानुनहरूका कारण जनताले सेवा पाउन कठिनाइ भइरहेको सन्दर्भमा, ती कानुनहरूको संशोधन र परिमार्जनका लागि डीना जस्तो अनुभवी व्यक्तिको संसद्मा उपस्थिति अनिवार्य देखिन्छ । उनले विगतमा सदनमा प्रस्तुत गरेका तर्कहरू र विधेयकहरूमाथिको छलफलमा राखेका धारणाहरूले उनको उच्च बौद्धिक क्षमतालाई पुष्टि गर्छन् । मकवानपुर क्षेत्र नं. १ बाट उनी संसद्मा पुग्दा केवल एउटा जिल्लाको प्रतिनिधि मात्र होइन, सिंगो देशकै नीति निर्माणमा प्रभाव पार्न सक्ने एक सक्षम विधायकको उपस्थिति हुनेछ । उनले महिला सशक्तिकरणका लागि गरेका कानुनी लडाइँहरू र सदनमा दिएका अभिव्यक्तिहरूले उनलाई एक सफल संसदीय व्यक्तित्वका रूपमा स्थापित गरिसकेका छन् । त्यसैले, संसद्मा एक सशक्त र अनुभवी आवाजको रूपमा उनको उपस्थिति यसपटकको मुख्य आवश्यकता हो ।

सुरक्षित बाटो त्यागेर प्रत्यक्ष निर्वाचनको मैदानमा

यसपटकको निर्वाचनमा डीना उपाध्यायको एउटा निर्णयले सबैको ध्यान आकर्षित गरेको छ । 

नेपाली कांग्रेसको सह–महामन्त्री जस्तो उच्च पदमा रहीसकेकी उनी समानुपातिक तर्फको बन्दसूचीमा पहिलो नम्बरमा बसेर सहजै सांसद बन्ने अवसर उपलब्ध थियो । त्यसका अलावा राष्ट्रिय सभाको सहज बाटो पनि थियो । तर, उनले त्यो सुविधायुक्त र सुरक्षित बाटो रोजिनन् । उनको स्पष्ट अडान थियो कि संसद्मा जानाका लागि जनताको प्रत्यक्ष मत र विश्वास प्राप्त गर्नुपर्छ । यो निर्णयले उनको आत्मविश्वास र मकवानपुरका जनताप्रतिको उत्तरदायित्वलाई प्रस्ट पार्छ । 

प्रत्यक्ष निर्वाचनमा जाँदा जनतासँग सिधै जोडिन पाइने, उनीहरूका समस्या सुन्न पाइने र निर्वाचित भएपछि जनताप्रति जवाफदेही हुन सहज हुने उनको मान्यता छ । समानुपातिकबाट सांसद बन्नु र प्रत्यक्ष निर्वाचित भएर आउनुमा राजनीतिक वजन र नैतिक शक्तिको ठूलो अन्तर हुन्छ ।

डीनाले यसपटक प्रत्यक्ष निर्वाचन रोज्नुको पछाडि मकवानपुर क्षेत्र नं. १ को विकास र यहाँका अधुरा योजनाहरूलाई पूर्णता दिने दृढ संकल्प रहेको देखिन्छ । उनले चुनावी सभाहरूमा भनेकी छिन्– “मलाई पदको लोभ छैन, मलाई त मकवानपुरका जनताको सेवा गर्ने र यहाँको मुहार फेर्ने अवसर चाहिएको हो ।” एउटा नेताले जब सुरक्षित विकल्प छाडेर संघर्षको मैदान रोज्छ, त्यसले उसको नेतृत्व क्षमता र इमानदारितालाई झल्काउँछ । मकवानपुरमा लामो समयदेखि देखिएको राजनीतिक शून्यता र विकासको सुस्त गतिलाई चिर्नका लागि एक शक्तिशाली र प्रत्यक्ष निर्वाचित नेतृत्वको आवश्यकता छ । 

डीना उपाध्यायले प्रत्यक्ष निर्वाचनमा उत्रिएर आफूलाई जनताको कसीमा जाँचिन तयार गरेकी छिन् । यो कदमले उनलाई मतदातामाझ थप लोकप्रिय बनाएको छ । त्यो सँगै पार्टीभित्र देखिएका विगतका तितो–मिठोको अवस्था सेटल भएको छ । यसले कार्यकर्ताहरूमा उत्साह पैदा भएको छ  । प्रत्यक्ष निर्वाचित सांसदको हैसियतले केन्द्र सरकारसँग बजेट र योजनाका लागि बार्गेनिङ गर्न जति सहज हुन्छ, त्यो समानुपातिक सांसदका लागि हुँदैन । त्यसैले, मकवानपुरको समग्र विकासका लागि र केन्द्रमा जिल्लाको दह्रो उपस्थिति जनाउनका लागि डीना उपाध्यायले रोजेको यो प्रत्यक्ष निर्वाचनको बाटो अत्यन्तै सराहनीय र रणनीतिक रूपमा सही छ ।

हेटौँडालाई ‘साँच्चिकै’ प्रदेश राजधानी बनाउने संकल्प

बागमती प्रदेशको राजधानीलाई हेटौंडामा लैजानको लागि तत्कालीन समयमा नेतृत्वलाई उच्च दवाव सिर्जना गराएकी डिना र नेपाली कांग्रेसले राजधानी त हेटौंडा लैजान सफल भयो तर राजधानीले पाउनुपर्ने प्रशासनिक गरिमा र पूर्वाधार अझै अपुरो छ । महालक्ष्मी उपाध्याय ‘डीना’ को मुख्य चुनावी एजेन्डा नै हेटौँडालाई ‘साँच्चिकै’ र ‘पूर्ण’ प्रदेश राजधानी बनाउनु हो । राजधानी भनेको केवल केही सरकारी भवनहरू हुनु मात्र होइन, यसको कनेक्टिभिटी, पूर्वाधार र सेवा प्रवाह अन्तर्राष्ट्रिय मापदण्डको हुनुपर्छ भन्ने उनको मान्यता छ । अहिले पनि धेरै प्रादेशिक संरचनाहरू हेटौँडामा पूर्ण रूपमा स्थापित हुन सकेका छैनन्, जसका कारण कर्मचारी र सेवाग्राहीलाई काठमाडौँकै मुख ताक्नुपर्ने अवस्था छ । 

डीनाले यसपटकको संसद्मा हेटौँडाको यो अधुरो पहिचानलाई पूर्णता दिन विशेष पहल गर्ने संकल्प गरेकी छिन् । उनले हेटौँडालाई काठमाडौँ र तराईसँग जोड्ने फास्ट ट्रर्याक, कान्ति लोकपथ र सुरुङ मार्ग जस्ता आयोजनाहरूलाई समयमै सम्पन्न गराई हेटौँडालाई ‘ट्रान्जिट हब’ का रूपमा विकास गर्ने योजना अघि सारेकी छिन् ।

उनको दृष्टिकोणमा हेटौँडाको विकास हुनु भनेको सिंगो मकवानपुरको आर्थिक गतिविधि बढ्नु हो । उनले हेटौँडालाई ‘स्मार्ट सिटी’ का रूपमा विकास गर्नका लागि आवश्यक पर्ने चक्रपथ निर्माण, ढल निकास र व्यवस्थित बसोबासका योजनाहरूलाई केन्द्र सरकारको बजेटमा प्राथमिकतामा राख्ने प्रतिबद्धता जनाएकी छिन् । राजधानी सहरमा हुनुपर्ने विशेषज्ञ अस्पताल, प्राविधिक विश्वविद्यालय र आइटी पार्क जस्ता संरचनाहरू निर्माण गरी हेटौँडालाई शैक्षिक र स्वास्थ्य केन्द्रका रूपमा स्थापित गर्ने उनको लक्ष्य छ । प्रदेश राजधानीका रूपमा हेटौँडाको विकास हुँदा यहाँको पर्यटन र व्यापारमा पनि ठूलो टेवा पुग्ने उनको विश्लेषण छ । 

डीना उपाध्याय जस्तो केन्द्रमा प्रभाव राख्ने नेता संसद्मा हुँदा मात्र हेटौँडाको यो गुरुयोजनाले मूर्त रूप पाउने सम्भावना रहन्छ । उनले विगतमा जलस्रोत राज्यमन्त्री हुँदा देखाएको कार्यक्षमताले पनि उनी ठूला पूर्वाधार आयोजनाहरू अघि बढाउन सक्षम छिन् भन्ने पुष्टि गर्छ । हेटौँडाको गौरव बढाउन र यसलाई देशकै नमूना राजधानी सहर बनाउनका लागि डीनाको स्पष्ट मार्गचित्र र दृढ इच्छाशक्ति यसपटकको निर्वाचनको मुख्य आकर्षण बनेको छ ।

किन डीनालाई नै भोट ?

यो निर्वाचनमा मतदाताका सामु धेरै उम्मेदवारहरू छन्, तर डीना उपाध्यायलाई नै भोट दिनुपर्ने केही ठोस र वस्तुपरक आधारहरू छन् । 

पहिलो आधार भनेको उनको ‘नीतिगत पहुँच र प्रभाव’ हो । डीना नेपाली कांग्रेसको सह–महामन्त्री रहिसकेकी छिन् । उनले निर्वाचन जित्दा उनी केवल एक सामान्य सांसद मात्र हुन्नन्, उनी सत्ता र शक्तिको केन्द्रमा सिधै संवाद गर्न सक्ने र मन्त्रिपरिषद्मा प्रभाव पार्न सक्ने नेतृत्व हुन् । मकवानपुरको विकासका लागि केन्द्र सरकारबाट बजेट ल्याउन, प्रदेश सरकारलाई प्रभाव पार्न र योजना स्वीकृत गराउन उनको यो हैसियत अरू उम्मेदवारको तुलनामा निकै माथि छ । 

दोस्रो आधार उनको ‘स्वच्छ र निष्कलंक छवि’ हो । ४० वर्षको लामो राजनीतिक जीवनमा उनीमाथि कुनै पनि भ्रष्टाचार वा आर्थिक अनियमितताको आरोप लागेको छैन । उनको इमानदारिता र निष्ठा नै उनको सबैभन्दा ठूलो राजनीतिक पूँजी हो ।

तेस्रो आधार उनको ‘संसदीय अनुभव’ हो । संसद् भनेको विकास बजेट माग्ने ठाउँ मात्र होइन, यो कानुन बनाउने ठाउँ पनि हो । डीनासँग संसद्का समितिहरूमा बसेर कानुन निर्माण गरेको र राज्यका जटिल मुद्दाहरूमा बहस गरेको गहिरो अनुभव छ । नयाँ र अपरिपक्व व्यक्तिलाई संसद्को प्रक्रिया बुझ्न नै धेरै समय लाग्छ, तर डीनाले पहिलो दिनदेखि नै मकवानपुरको पक्षमा प्रभावकारी भूमिका खेल्न सक्छन् ।

चौथो आधार ‘महिला नेतृत्व र सामाजिक न्याय’ हो । संसद्मा महिलाका मुद्दा, किसानका समस्या र सुशासनको पक्षमा उनले सधैं निर्भीकतापूर्वक आवाज उठाउँदै आएकी छिन् । उनको जितले मकवानपुरका हजारौँ महिला र पिछडिएका समुदायको आवाजलाई राष्ट्रिय मञ्चमा पु¥याउने ग्यारेन्टी गर्छ । 

पाँचौँ आधार ‘स्थानीयता र जवाफदेहिता’ हो । उनी मकवानपुरकै माटोमा जन्मी–हुर्की यहीँको राजनीतिमा खारिएको नेता हुन् । उनका लागि हेटौँडा र मकवानपुर केवल निर्वाचन क्षेत्र मात्र होइनन्, उनको कार्यथलो पनि हुन् । उनी निर्वाचनपछि पनि यहीँका जनताको सुखदुःखमा उपलब्ध हुने नेतृत्व हुन् । 

यी सबै कारणहरूले गर्दा मकवानपुर क्षेत्र नं. १ का सचेत मतदाताले यसपटक अनुभवी, पहुँचवाला र निष्ठावान् नेताका रूपमा डीना उपाध्यायलाई नै रोज्नुपर्ने देखिन्छ ।

कृषि, उद्योग र सुशासनको ठोस कार्ययोजना

मकवानपुर क्षेत्र नं. १ को आर्थिक र सामाजिक रूपान्तरणका लागि डीना उपाध्यायले अघि सारेको कार्ययोजना अत्यन्तै व्यावहारिक र समयसापेक्ष देखिन्छ । मकवानपुरको एक ठूलो हिस्सा कृषिमा आधारित छ । तर, किसानहरूले समयमा मल नपाउने, सिँचाइको असुविधा र उत्पादनको उचित मूल्य नपाउने समस्या वर्षौँदेखि भोग्दै आएका छन् । उपाध्यायले यो विषयलाई आफ्नो मुख्य चुनावी एजेन्डा बनाएकी छिन् । उनले रासायनिक मलको निर्भरता घटाएर प्राङ्गारिक खेतीलाई प्रोत्साहन गर्ने र माटोको उर्वराशक्ति बचाउनका लागि राज्यस्तरबाटै विशेष प्याकेज ल्याउनुपर्ने कुरामा जोड दिएकी छिन् । उनको तर्क छ कि जबसम्म किसानको जीवनस्तर सुध्रिँदैन, तबसम्म देशको अर्थतन्त्र बलियो हुन सक्दैन । यसका लागि उनले संसद्मा कृषि क्षेत्रको बजेट वृद्धि र किसानलाई उत्पादनका आधारमा सिधै अनुदान दिने व्यवस्थाका लागि पहल गर्ने प्रतिबद्धता व्यक्त गरेकी छिन् ।

कृषिसँगै हेटौँडाको औद्योगिक विकास पनि उनको प्राथमिकतामा छ । हेटौँडालाई बागमती प्रदेशको राजधानी घोषणा गरिए पनि यहाँका पुराना उद्योगहरू धराशायी हुँदै गएका छन् । डीनाले ती उद्योगहरूको पुनरुत्थान गर्ने र नयाँ औद्योगिक क्षेत्रहरूको विस्तार गरी स्थानीय युवाहरूलाई रोजगारी दिने योजना अघि सारेकी छिन् । उनले रोजगारीका लागि विदेश पलायन हुने युवाहरूको संख्या घटाउन स्थानीय तहमै सीपमूलक शिक्षा र उद्यमशीलतालाई प्रोत्साहन गर्ने नीति बनाउने बताएकी छिन् । 

यसका साथै, सुशासनको मुद्दामा पनि उनको स्पष्ट अडान छ । भ्रष्टाचार न्यूनीकरण र सरकारी सेवामा सहज पहुँच उनका राजनीतिक लक्ष्य हुन् । उनले भनेकी छिन् कि सरकारी कार्यालयहरूमा जनताले पाउने सास्तीको अन्त्य हुनुपर्छ र प्रविधिको प्रयोग गरी सेवालाई झन्झटमुक्त बनाउनुपर्छ । शिक्षा र स्वास्थ्यका क्षेत्रमा मकवानपुरमा देखिएका समस्या समाधानका लागि उनले जिल्लाका सामुदायिक विद्यालयहरूको गुणस्तर सुधार र हेटौँडा अस्पताललाई शिक्षण अस्पतालका रूपमा विकास गर्ने ठोस खाका तयार पारेकी छिन् । 

यी एजेन्डाहरू केवल नारामा मात्र सीमित छैनन्, बरु उनको विगतको कार्यक्षमता र अनुभवका आधारमा कार्यान्वयन योग्य देखिन्छन् । त्यसैले, मकवानपुरको चौतर्फी समृद्धिका लागि डीना उपाध्यायको नेतृत्व यसपटक अपरिहार्य देखिएको छ ।

नयाँ पुस्ताको माग र पार्टी रूपान्तरणको एजेन्डा

वर्तमान राजनीतिमा नयाँ पुस्ताका चाहना र आवश्यकतालाई बुझ्न सक्ने नेतृत्वको खाँचो छ । डीना उपाध्यायले यसलाई गम्भीरताका साथ लिएकी छिन् । उनले अघि सारेको “बदलिन्छौँ हामी, बदल्छौँ कांग्रेस” भन्ने नाराले पार्टीभित्र र बाहिर एक प्रकारको हलचल पैदा गरेको छ । उनले स्पष्ट रूपमा स्वीकार गरेकी छिन् कि पुराना पुस्ताका नेताहरूले समयको माग अनुसार आफूलाई परिमार्जन गर्नुपर्छ । उनले ‘जेन–जी’ (न्भल–श्) अर्थात् नयाँ पुस्ताका युवाहरूको भावना, प्रविधिप्रतिको उनीहरूको लगाव र उनीहरूले चाहेको पारदर्शी राजनीतिको पक्षमा आफूलाई उभ्याएकी छिन् । युवाहरूले राजनीतिमा केवल गफ होइन, परिणाम खोजिरहेका छन् भन्ने कुरा उनले आफ्ना चुनावी सभाहरूमा पटक–पटक उल्लेख गरेकी छिन् ।

उनले भनेकी छिन्– “अब बहानाबाजी गरेर उम्किने समय छैन, हामीले जनताका सामु गरेका प्रतिबद्धताहरू पूरा गर्नैपर्छ ।” यो अभिव्यक्तिले उनको उत्तरदायित्व बोधलाई झल्काउँछ । तात्कालिन अवस्थामा पार्टीको सह–महामन्त्रीका हैसियतले उनले नेपाली कांग्रेसलाई थप लोकतान्त्रिक, समावेशी र आधुनिक बनाउन महत्वपूर्ण भूमिका खेलेकी थिइन् । युवाहरूलाई नेतृत्व हस्तान्तरण गर्ने र उनीहरूको क्षमतालाई देश निर्माणमा लगाउने उनको सोचले गर्दा यसपटक मकवानपुरका युवा मतदाताहरू उनीप्रति आकर्षित देखिएका छन् । उनले राजनीतिलाई पेशा होइन, सेवाका रूपमा बुझ्नुपर्छ भन्ने मान्यता राख्छिन् । उनको स्वच्छ छवि र सधैं जनताको माझमा रहनु नै उनको जितको मुख्य आधार हो । 

मकवानपुर क्षेत्र नं. १ का मतदाताले यसपटक एउटा यस्तो नेता खोजिरहेका छन्, जसले केन्द्रमा आफ्नो कुरा दृढतापूर्वक राख्न सकोस् र जिल्लाको हितका लागि कसैसँग सम्झौता नगरोस् । डीना उपाध्यायमा ती सबै गुणहरू विद्यमान छन् । उनको जितले केवल एकजना सांसदको संख्या थप्ने मात्र होइन, बरु मकवानपुरको भविष्यलाई उज्यालो बनाउने र नेपाली राजनीतिमा एउटा सकारात्मक सन्देश दिने निश्चित छ । फागुन २१ को निर्वाचन मकवानपुरका लागि एउटा ऐतिहासिक अवसर हो ।