युक्रेनले मस्कोतर्फ प्रहार गर्‍यो करिब ६०० ड्रोन, रुसी सेनाले २०१ वटा खसाले

लन्डन: युक्रेनले शनिबार रातिदेखि आइतबार बिहानसम्म रुसको राजधानी मस्कोतर्फ करिब ६०० ड्रोन प्रहार गरेको रुसी अधिकारीहरूले बताएका छन्। मस्कोका मेयर सर्गेई सोब्यानिनका अनुसार रुसी वायु प्रतिरक्षा प्रणालीले मस्को क्षेत्रमा कम्तीमा २०१ युक्रेनी ड्रोन खसालेको छ। उनले घटनाबाट भएको क्षति वा हताहतीबारे जानकारी नदिए पनि ड्रोनका भग्नावशेष खसेका स्थानमा उद्धार तथा आपत्कालीन टोली परिचालन गरिएको बताए।

तर मस्को क्षेत्रका गभर्नर आन्द्रे भोरोब्योभले रामेन्स्की जिल्लामा ड्रोन आवासीय क्षेत्रमा खस्दा एक जनाको मृत्यु भएको बताएका छन्। रुसी रक्षा मन्त्रालयले भने रातभर देशका १६ क्षेत्र, क्रिमिया तथा आजोभ र ब्ल्याक सी क्षेत्रमा गरी कम्तीमा ८२२ युक्रेनी ड्रोन खसालेको दाबी गरेको छ। रोस्तोभ क्षेत्रमा ड्रोन आक्रमणबाट पाँच जना र बेलगोरोद क्षेत्रमा बसमाथि भएको आक्रमणमा एक जनाको मृत्यु भएको स्थानीय अधिकारीहरूले बताएका छन्।

यसैबीच, युक्रेनी सेनाले मस्को नजिकै पोडोल्स्कमा रहेको रुसी ई–कमर्स कम्पनी वाइल्डबेरीजको गोदाममा समेत ड्रोन प्रहार गरेको जनाइएको छ। आक्रमणपछि कम्पनीको एक गोदाममा आगलागी भएको बताइएको छ। ड्रोन आक्रमणका कारण मस्कोका तीनसहित रुसका विभिन्न विमानस्थलमा अस्थायी उडान प्रतिबन्धसमेत लगाइएको थियो।

रुसले पनि युक्रेनमाथि लामो दूरीका क्षेप्यास्त्र र ड्रोनबाट आक्रमण जारी राखेको छ। युक्रेनी वायुसेनाका अनुसार रुसले पछिल्लो आक्रमणमा १०६ ड्रोन र केही क्षेप्यास्त्र प्रहार गरेको थियो। राष्ट्रपति भोलोदिमिर जेलेन्स्कीले राजधानी किभसहित विभिन्न क्षेत्रमा मानवीय क्षति भएको बताएका छन् र उत्तर कोरियाबाट रुसले प्राप्त गरिरहेको सैन्य सहयोगलाई रोक्न पश्चिमी मुलुकसँग थप वायु प्रतिरक्षा सहयोग मागेका छन्।