याम्बालिङ हाइड्रोको आइपिओ बाँडफाँड

काठमाण्डौ, ३० वैशाख । याम्बालिङ हाइड्रोपावर लिमिटेडको साधारण शेयर निष्कासनको बाँडफाँड सम्पन्न भएको छ । कम्पनीको शेयर बिक्री प्रबन्धक मुक्तिनाथ क्यापिटल लिमिटेडको नक्सालस्थित कार्यालयमा बुधबार आइपिओ बाँडफाँड गरिएको हो ।

कम्पनीले सर्वसाधारणका लागि वैशाख १६ गतेदेखि २२ गतेसम्म १७ लाख ४३ हजार कित्ता साधारण शेयर बिक्री खुला गरेको थियो ।

कम्पनीको जारी पुँजी ७० करोड रुपैयाँ रहेको छ । यसमध्ये ४० प्रतिशत अर्थात् २८ लाख कित्ता शेयर सर्वसाधारणलाई छुट्याइएको छ । कुल जारी पुँजीमध्ये १० प्रतिशत अर्थात् ७ लाख कित्ता शेयर सिन्धुपाल्चोक जिल्लाका आयोजना प्रभावित स्थानीय बासिन्दालाई वितरण गरिएको थियो । बाँकी ३० प्रतिशत अर्थात् २१ लाख कित्ता शेयर सर्वसाधारणका लागि छुट्याइएको हो । सर्वसाधारणतर्फ छुट्याइएको २१ लाख कित्तामध्ये १० प्रतिशत अर्थात् २ लाख १० हजार कित्ता वैदेशिक रोजगारीमा रहेका नेपालीका लागि सुरक्षित गरिएको थियो । त्यस्तै २ प्रतिशत अर्थात् ४२ हजार कित्ता कम्पनीका कर्मचारीका लागि र ५ प्रतिशत अर्थात् १ लाख ५ हजार कित्ता सामूहिक लगानी कोषका लागि छुट्याइएको थियो । बाँकी १७ लाख ४३ हजार कित्ता शेयर सर्वसाधारणमा बिक्री गरिएको हो ।

यस निष्कासनमा २९ लाख ३८ हजार ८२  योग्य आवेदनबाट ३ करोड १९ लाख ५६ हजार ९१० कित्ताका लागि आवेदन परेको थियो । यस्तै ४४ हजार ४१६ वटा आवेदन भने रद्द भएका छन् ।

बाँडफाँड परिणामअनुसार गोलाप्रथामार्फत १ लाख ७४ हजार ३०० जना लगानीकर्ताले जनही १० कित्ताका दरले शेयर प्राप्त गरेका छन् ।

आइपिओको नतिजा सिडीएसीको आइपिओ रिजल्ट र मेरोशेयरको वेभसाइटमा हेर्न सकिने  निष्कासन तथा बिक्री प्रबन्धक मुक्तिनाथ क्यापिटलले जनाएको छ ।