यूएई: तेलको साम्राज्यदेखि क्रिप्टोको विश्वव्यापी केन्द्रसम्म

विशाल तेलका खानी र भव्य भौतिक संरचनाका लागि परिचित संयुक्त अरब इमिरेट्स (यूएई) ले अब आफ्नो विश्वव्यापी पहिचान बदल्ने तयारी गरेको छ। 

हिजोसम्म 'क्रुड आयल' अर्थात् कच्चा तेलले देशको अर्थतन्त्रको जग बसालेको यूएई अहिले द्रुत गतिमा 'क्रिप्टो' र डिजिटल सम्पत्तिको नयाँ शक्ति केन्द्र बन्दैछ।

विश्व अर्थतन्त्रमा सधैं पहिलो हुने महत्त्वाकाङ्क्षाका साथ यूएईले पछिल्लो समय क्रिप्टो क्षेत्रमा ठूलो लगानी र नीतिगत सुधार गरिरहेको छ। केही वर्ष अघिसम्म अपरिचित विषय जस्तो रहेको क्रिप्टो अहिले यूएईको नयाँ आर्थिक एजेन्डा बनेको छ। यूएईका अधिकारीहरूले अहिले अन्तर्राष्ट्रिय मञ्चहरूमा आफूहरूलाई 'क्रिप्टोको विश्वव्यापी केन्द्र' का रूपमा गर्वका साथ प्रस्तुत गर्न थालेका छन्।

तथ्याङ्क अनुसार यूएईको यो नयाँ नीतिका कारण विश्वभरका लगानीकर्ताहरू यसतर्फ आकर्षित भएका छन्। सन् २०२५ सम्ममा विश्वका करिब ९ हजार ८ सय जना धनाढ्य व्यक्तिहरू आफ्नो व्यापार र लगानी लिएर यूएई सर्ने अनुमान गरिएको छ।

अमेरिका लगायतका ठूला अर्थतन्त्र भएका देशहरूमा क्रिप्टो नियमनलाई लिएर अझै पनि अन्योल र राजनीतिक अस्थिरताका कारण नीतिहरू फेरिने डर छ। तर, यूएईले यस क्षेत्रमा देखाएको 'कानुनी स्पष्टता' र 'काम गर्ने गति' नै लगानीकर्ताका लागि सबैभन्दा ठूलो आकर्षण बनेको छ। यहाँको सरकारले क्रिप्टोलाई एउटा दीर्घकालीन प्रतिबद्धताको रूपमा लिएकाले लगानीकर्ताहरू सुरक्षित महसुस गरिरहेका छन्।

परम्परागत तेल व्यवसायमा रहेका ठूला कम्पनीहरू समेत अहिले बिटक्वाइन र ब्लकचेन प्रविधिको प्रयोगबारे गम्भीर छलफलमा जुटेका छन्। युवा उद्यमीहरूलाई नयाँ प्रयोग गर्न दिइएको स्वतन्त्रताले गर्दा यहाँ डिजिटल डाटालाई सम्पत्तिमा बदल्ने होड चलेको छ।

मरुभूमिलाई आधुनिक महानगरमा बदलेको यूएईले अब बालुवालाई सुनमा मात्र होइन, प्रविधिलाई डलरमा रूपान्तरण गर्ने बाटो रोजेको छ। जोखिमका बाबजुद यूएईले समयमै लिएको यो साहसिक निर्णयले भविष्यको डिजिटल अर्थतन्त्रमा उसको वर्चस्व अझ बढ्ने देखिन्छ।