एप्पलले सिरीमा ठुलो परिवर्तन ल्याउदै, के के आउदैछन् फिचर ?

काठमाण्डौ, १३ चैत्र । एप्पलले यस बर्षको वोर्ल्डवाइड डेभलपर कन्फेरेन्सबाट आफ्नो भर्चुअल सहायक सिरीमा ठूला परिवर्तन ल्याउने तयारी गरेको छ । नयाँ आइओएस २७ सँगै सिरीलाई दैनिक प्रयोगमा अझ उपयोगी बनाउने कम्पनीको लक्ष्य रहेको बताइएको छ ।

रिपोर्टअनुसार अब सिरी केवल साधारण आवाज आदेशमा सीमित हुने छैन । नयाँ अपडेटमा ‘आस्क सिरी’ नामको बटन आउनेछ, जसले विभिन्न एप्सभित्रै सिधै सिरी प्रयोग गर्न सजिलो बनाउनेछ । यसमार्फत प्रयोगकर्ताले स्क्रिनमा देखिएको सामग्री चयन गरेर तुरुन्तै त्यसको सार वा थप जानकारी लिन सक्नेछन् ।

सिरीको स्वरूपमा पनि परिवर्तन गरिने भएको छ । अहिले देखिने स्क्रिनभरि फैलिने प्रकाश प्रभाव हटाएर सानो र कम्प्याक्ट प्यानल राखिने तयारी छ । यसले काम गर्दै गर्दा पनि सहज रूपमा सिरी प्रयोग गर्न सकिने बताइएको छ ।

यसका साथै सिरीको आफ्नै छुट्टै एप ल्याउने तयारी भइरहेको छ । यस एपमार्फत प्रयोगकर्ताले पुराना कुराकानी सुरक्षित राख्न, खोज्न र आवश्यक सामग्री ‘पिन’ गर्न सक्नेछन् । आवाज र लेखेर दुवै तरिकाले सिरी प्रयोग गर्न मिल्ने सुविधा पनि थपिनेछ ।

कम्पनीले सिरीलाई कृत्रिम बुद्धिमत्तामार्फत अझ समझदार बनाउने योजना बनाएको छ । अब सिरीले प्रयोगकर्ताको सन्दर्भ बुझेर अझ सही र उपयोगी जवाफ दिन सक्नेछ। यसले सन्देश, नोट र क्यालेन्डर जस्ता एप्ससँग पनि राम्रो समन्वय गर्नेछ ।

यी नयाँ सुविधाहरूको घोषणा जुन ८ देखि १२ सम्म हुने कार्यक्रममा गरिने सम्भावना छ । तर सबै सुविधा एकैपटक नआइ क्रमशः अपडेटमार्फत उपलब्ध गराइने जनाइएको छ ।