नेपाली काँगेस (सनातन हिन्दूराष्ट्र स्थापना महाअभियान) द्वारा विशेष पत्रकार सम्मेलनको आह्वान

काठमाडौँ: नेपाली काँगेसभित्र सक्रिय ‘सनातन हिन्दूराष्ट्र स्थापना महाअभियान’ले आगामी साउन ८ गते शुक्रबारका दिन एक विशेष पत्रकार सम्मेलनको आयोजना गर्ने भएको छ।

महाअभियानका सह-संयोजक एवम् प्रवक्ता लोकेश ढकालद्वारा जारी प्रेस विज्ञप्ति अनुसार, महाअभियानले आफ्नो राजनीतिक अवधारणा सार्वजनिक गर्ने उद्देश्यले उक्त पत्रकार सम्मेलन डाकेको हो।

नेपाली काँगेसभित्र वि.सं. २०७९ सालदेखि सनातन हिन्दूराष्ट्र स्थापनाका लागि महाअभियान गठन गरी वैचारिक आन्दोलन सञ्चालन गरिँदै आएको छ। यसअघि पार्टीको गोदावरीमा सम्पन्न महासमिति बैठकमा समेत अभियानका वर्तमान संयोजक शंकर भण्डारीको अगुवाइमा बहुमत सदस्यहरूको हस्ताक्षरसहित सनातन हिन्दूराष्ट्रको पक्षमा माग प्रस्तुत गरिएको विज्ञप्तिमा स्मरण गराइएको छ।

महाअभियानले वर्तमान समयमा नेपाली काँगेस सिद्धान्तहीन र दिशाहिन बन्दै विभाजनतर्फ अग्रसर भइरहेको भन्दै चिन्ता व्यक्त गरेको छ। विज्ञप्तिमा पार्टी विभाजन नहोस् र वैचारिक आधारमा पार्टीभित्र बृहत् एकता कायम होस् भन्ने आग्रह गर्दै अभियानको स्पष्ट राजनीतिक दृष्टिकोण सञ्चारमाध्यममार्फत सार्वजनिक गर्न लागिएको जनाइएको छ।

पत्रकार सम्मेलनको विवरण:
मिति: शुक्रबार, ८ साउन २०८३
समय: दिउँसो ठीक २ बजे
स्थान: अनुपम फुडल्याण्ड, बत्तीसपुतली, काठमाडौँ

आयोजकका तर्फबाट राष्ट्रिय दैनिक, साप्ताहिक, टेलिभिजन, रेडियो तथा अनलाइन पत्रिकाका मिडिया टोली एवम् प्रतिनिधिहरूलाई समाचार संकलनका लागि उपस्थिति भइदिन हार्दिक आमन्त्रण गरिएको छ।