गगनको ‘तर्सिने बानी परेन’ स्ट्याटसपछि सौरभ राज पन्तको सुझाव—बालेन, गगन र रविलाई : ‘चेकमेट आफ्नै पक्षलाई होइन, बाह्य शक्तिकेन्द्रलाई दिन सक्नुपर्छ’

काठमाण्डौ, १७ कार्त्तिक । ‘एआईको युगमा नेपाल’ अभियानका संयोजक सौरभ राज पन्तले बदलिँदो राष्ट्रिय तथा अन्तर्राष्ट्रिय परिस्थितिमा नेपालको राष्ट्रिय हितको रक्षा गर्न आन्तरिक राजनीतिक तथा संस्थागत समझदारी अपरिहार्य रहेको बताएका छन् ।

नेपाली कांग्रेसका सभापति गगन थापाले सामाजिक सञ्जालमा लेखेको पछिल्लो स्ट्याटस— ‘अहिले ठीक १८:०० बजेको छ । तर्साउने धेरै आए, तर्सिने बानी परेन।’—लाई सन्दर्भ बनाउँदै पन्तले यस्तो धारणा सार्वजनिक गरेका हुन् ।पन्तले जंगी अड्डा, नक्सालस्थित प्रहरी प्रधान कार्यालय, रवि लामिछाने, बालेन शाह र गगन थापाबीच राष्ट्रिय हितका विषयमा साझा समझदारी र समन्वय कायम हुनुपर्नेमा जोड दिएका छन् ।

उनका अनुसार दिल्ली, वासिङ्टन डीसी र बेइजिङसँग नेपालको हितअनुकूल प्रभावकारी संवाद तथा कूटनीतिक वार्ता गर्नुअघि मुलुकभित्रै राजनीतिक नेतृत्व, सुरक्षा निकाय र राज्यका संस्थाहरूबीच आवश्यक ‘ट्युनिङ’ मिल्नुपर्छ । आन्तरिक रूपमा अविश्वास र असमझदारी कायम राखेर बाह्य शक्तिकेन्द्रहरूसँग प्रभावकारी रूपमा डिल गर्न नसकिने उनको तर्क छ ।

अन्तर्राष्ट्रिय राजनीतिमा शक्ति सन्तुलनको प्रतिस्पर्धा तीव्र भइरहेका बेला नेपालले आफ्नै आन्तरिक शक्ति र संस्थाहरूबीच द्वन्द्व बढ्न दिन नहुने पन्तको भनाइ छ ।

उनले भनेका छन्, “सतरञ्जको खेलमा चेकमेट आफ्नै पक्षलाई होइन, बाह्य शक्तिकेन्द्रलाई दिन सक्नुपर्छ ।” पन्तका अनुसार नेपालको आन्तरिक राजनीतिक शक्ति र नेतृत्व विभिन्न दिशामा विभाजित देखिएको अवस्थामा साझा राष्ट्रिय दृष्टिकोण निर्माण गर्नु झन् आवश्यक छ । राष्ट्रिय हितका सवालमा राजनीतिक दल, सुरक्षा निकाय, संस्थागत नेतृत्व र अन्य सरोकारवालाबीच संवाद, समन्वय र सहकार्य हुनुपर्ने उनले बताएका छन् ।

यसै सन्दर्भमा पन्तले ‘एआईको युगमा नेपालका लागि साझा बाटो खोज्दै’ खुला राष्ट्रिय अभियानको औचित्यसमेत पुनः स्मरण गराएका छन् । बदलिँदो भू-राजनीतिक परिवेशमा नेपालको राष्ट्रिय स्वार्थ, सार्वभौमिकता, राष्ट्रिय सुरक्षा र दीर्घकालीन समृद्धिको संरक्षणका लागि व्यापक राष्ट्रिय समझदारी आवश्यक रहेको उनको धारणा छ ।

उनले राष्ट्रिय स्वार्थ र सार्वभौमिकताको रक्षा गर्न आन्तरिक एकतालाई नेपालको प्रभावकारी अन्तर्राष्ट्रिय कूटनीतिको आधार बनाउनुपर्ने बताएका छन् ।