चौधरी ग्रुपले म्यारियटका दुई लक्जरी होटल नेपाल भित्र्याउने, सन् २०३१ सम्म सञ्चालनमा आउने

काठमाडौं: चौधरी ग्रुप (सीजी) ले विश्वप्रसिद्ध होटल चेन म्यारियट इन्टरनेसनलसँगको सहकार्यमा नेपालमा दुई नयाँ लक्जरी होटल भित्र्याउने भएको छ । ग्रुपले काठमाडौंमा ‘द रिट्ज-कार्लटन’ र ‘द वेस्टिन’ सञ्चालनका लागि म्यारियटसँग सम्झौता गरेको हो । आइतबार आयोजित एक कार्यक्रममा म्यारियट इन्टरनेसनल र चौधरी ग्रुपबीच औपचारिक सम्झौतापत्रमा हस्ताक्षर भएको छ ।

यी दुई होटलहरू नेपालका अग्रणी व्यावसायिक घरानाहरू चौधरी ग्रुप, आईईजी ग्रुप, आईजे ग्रुप र शर्मा एन्ड कम्पनीको साझेदारीमा निर्माण हुनेछन् । सन् २०३१ सम्म सञ्चालनमा ल्याउने लक्ष्य राखिएका यी होटलहरूले नेपालको पर्यटन क्षेत्रमा करिब ३०० 'की' (कोठा) थप्नेछन् ।

हस्ताक्षर कार्यक्रममा म्यारियटका बोर्ड अध्यक्ष डेभिड म्यारियट, सीजीका अध्यक्ष विनोद चौधरी, प्रबन्ध निर्देशक राहुल चौधरी तथा म्यारियट एशिया प्रशान्तका अध्यक्ष राजीव मेनन लगायतको उपस्थिति थियो ।

द रिट्ज–कार्लटन, काठमाडौं
नेपालमा पहिलोपटक प्रवेश गर्न लागेको यो प्रतिष्ठित लक्जरी ब्रान्ड राजधानीको प्रमुख पर्यटकीय केन्द्र ठमेलमा स्थापना हुनेछ ।

सुविधा: ३० वटा सुइटसहित १५० वटा कोठाहरू, ५ वटा फरक रेस्टुरेन्ट तथा बार, आउटडोर स्विमिङ पुल, फिटनेस सेन्टर र स्पा ।

कार्यक्रम हल: व्यावसायिक तथा सामाजिक प्रयोजनका लागि ११०० वर्गमिटरभन्दा बढीको अत्याधुनिक हल ।

अवस्थिति: त्रिभुवन अन्तर्राष्ट्रिय विमानस्थलबाट ५ किलोमिटर दूरीमा, नारायणहिटी दरबार, काठमाडौं दरबार क्षेत्र र स्वयम्भूनाथ नजिक ।

द वेस्टिन काठमाडौं
पर्यटकको स्वास्थ्य र सन्तुलित जीवनशैली (वेलनेस) लाई प्राथमिकता दिने यो होटल विमानस्थलबाट करिब ७ किलोमिटर दूरीमा रहनेछ ।

सुविधा: १५० प्रिमियम कोठा तथा सुइट, ३ वटा डाइनिङ क्षेत्र, वेस्टिनवर्कआउट फिटनेस स्टुडियो, हेभेन्ली स्पा र रूफटप स्विमिङ पुल ।

बैठक हल: नेचुरल लाइट र स्मार्ट प्रविधियुक्त ७०० वर्गमिटरभन्दा बढीको बैंक्वेट सुविधा ।

सीजी र म्यारियटको बलियो वैश्विक सहकार्य

यो सम्झौता सीजी हस्पिटालिटी र म्यारियटबीचको निरन्तर विस्तारित सम्बन्धको परिणाम हो । दुई वर्षभन्दा कम अवधिमा भारतमा ‘सिरिज बाइ म्यारियट’ अन्तर्गत यी दुई समूहबीच ७५ भन्दा बढी होटल सम्झौता भइसकेका छन्, जसमध्ये ५० वटा सञ्चालनमा छन् । यसबाहेक फिलिपिन्समा 'द फार्म एट सान बेनिटो', दुबईमा 'जेडब्लु म्यारियट रेसिडेन्स' र सिलिगुडीमा 'जेडब्लु म्यारियट होटल' मा पनि यिनीहरूको सहकार्य रहेको छ ।