इजरायलको कारवाहीमा हिज्बुल्लाहका इन्जिनियरिङ युनिटका कमान्डरको मृत्यु

काठमाडौँ: इजराइलले लेबनानमा भएको पछिल्लो सैन्य कारबाहीमा हिज्बुल्लाहका एक कमान्डर मारिएको दाबी गरेको छ ।

इजराइली सेनाका अनुसार गएको साता लेबनानमा गरिएको हमलामा हिज्बुल्लाहको इन्जिनियरिङ युनिटका कमान्डर अब्द हरबको मृत्यु भएको हो । उनी दक्षिणी लेबनानमा इजराइली सैनिकलाई लक्षित गरी विस्फोटक उपकरण तयार पार्ने कार्यमा संलग्न रहेको इजराइलको भनाइ छ ।

इजराइलले थप जानकारी दिँदै आफ्नो वायुसेनाले रातभर गरेको कारबाहीमा हिज्बुल्लाहले इजराइली सेनामाथि आक्रमणका लागि प्रयोग गर्दै आएको एक रकेट प्रक्षेपण प्रणाली पनि नष्ट गरिएको जनाएको छ ।

त्यसैगरी, लितानी नदीको उत्तर क्षेत्रमा सक्रिय हिज्बुल्लाहका एक लडाकुलाई मारिएको दाबी पनि इजराइली सेनाले गरेको छ । कारबाहीका क्रममा हतियार भण्डारण केन्द्रबाट ठूलो मात्रामा हतियार समेत बरामद गरिएको बताइएको छ ।

बरामद हतियारमा एके राइफल, सटगन, सतहबाट हावामा मार गर्ने क्षेप्यास्त्र, गोलीगठ्ठा, ग्रेनेड तथा अन्य सैन्य सामग्री रहेका छन् । इजराइलका अनुसार दक्षिण लेबनानमा हिज्बुल्लाहका दुई छुट्टाछुट्टै लडाकु समूहलाई पनि निष्क्रिय पारिएको छ ।

यसैबीच, इजराइली सञ्चारमाध्यम ‘वाईनेट’ ले प्रधानमन्त्री बेन्जामिन नेतान्याहूलाई उद्धृत गर्दै अमेरिका मध्यस्थतामा भइरहेको लेबनान युद्धविराम सम्झौतामा हालसम्म इजराइली सरकारको औपचारिक स्वीकृति नदिइएको जनाएको छ ।

सुरक्षा मन्त्रिपरिषद्को बैठकमा नेतान्याहूले हाल कुनै सम्झौता नभएको भन्दै हिज्बुल्लाहको विरोधका कारण तत्काल निर्णय नगर्ने बताएका रिपोर्टमा उल्लेख छ । उनले भनेका छन्- 'अहिले कुनै सहमति छैन । यदि उनीहरू सहमत भए भने म यसलाई स्वीकृतिका लागि अघि लैजानेछु ।'

अमेरिका, इजराइल र लेबनानबीच युद्धविरामसम्बन्धी छलफल जारी रहेको समयमा यो अभिव्यक्ति आएको हो ।