सगरमाथामा हराएका दावा शेर्पा एक सातापछि जीवितै फेला

सगरमाथा आधार शिविर क्षेत्रबाट एक सातादेखि बेपत्ता भएका पर्यटन गाईड हिलारी भनिने दावा शेर्पा आज बिहान गम्भीर बिरामी अवस्थामा भेटिएका छन्।

आरोही पर्यटकहरूको सहयोगीका रूपमा गएका ओखलढुंगा खिजिदेम्बा गाउँपालिकाका शेर्पा एक साताअघि आधार शिविर फर्कने क्रममा हराएका थिए। उनको खोजीका लागि सगरमाथाको तेस्रो शिविर आसपास हेलिकोप्टर समेत परिचालन गरिए पनि उनी फेला परेका थिएनन्। आज बिहान खुम्बु आइसफलको क्र्याम्पोन पोइन्ट छेउबाट आधार शिविरतर्फ घस्रिँदै आइरहेको अवस्थामा सगरमाथा प्रदूषण नियन्त्रण समिति (एसपीसीसी) का कामदारहरूले उनलाई फेला पारेर उद्धार गरेका हुन्।

एसपीसीसीका कार्यकारी निर्देशक छिरिङ शेर्पा र पर्यटन बोर्डका पूर्व सदस्य ङावाङिमा शेर्पाका अनुसार हिउँले हात र खुट्टा खाएको अवस्थामा भेटिएका उनलाई प्रारम्भिक उपचार र खाना दिइएको छ। हाल उनको अवस्था स्थिर रहेको र थप उपचारका लागि हेलिकोप्टरबाट उद्धार गरिने बताइएको छ। अत्यधिक चिसो र प्रतिकूल मौसमका बीच एक सातापछि उनी जीवितै भेटिएको यो घटनालाई पर्वतारोहण क्षेत्रका व्यक्तिहरूले एउटा चमत्कारका रूपमा लिएका छन्।